ᠲᠥᠷᠦ ᠤᠯᠤᠰ ᠪᠠᠳᠤᠵᠢᠵᠤ ᠲᠥᠮᠡᠨ ᠥᠯᠵᠡᠢ ᠪᠥᠷᠢᠳᠦᠭᠰᠡᠨ᠂ | ᠳᠡᠬᠦᠰ ᠡᠩᠬᠡ ᠵᠢᠷᠭᠠᠯᠳᠤ ᠳᠥᠪᠰᠢᠨ ᠰᠠᠶᠢᠨ ᠥᠨᠥᠳᠦᠷ᠂ | ᠲᠠᠶᠢᠴᠢᠨ ᠶᠡᠭᠡ ᠳᠥᠷᠦ ᠶᠢᠨ ᠭᠤᠯᠤᠮᠳᠠ ᠶᠢ ᠠᠩᠬᠠ ᠡᠬᠦᠰᠭᠡᠭᠰᠡᠨ᠂ | ᠳᠠᠯᠠᠢ ᠴᠠᠭᠠᠨ ᠥᠷᠬᠦᠭᠡ ᠪᠠᠨ ᠳᠤᠷᠠᠳᠬᠠᠨ ᠪᠠᠶᠢᠵᠤ ᠢᠷᠦᠭᠡᠮᠦ᠃ | ᠪᠠᠳᠠᠷᠠᠬᠰᠠᠨ ᠶᠡᠭᠡ ᠬᠦᠷᠦᠨ ᠤ ᠰᠠᠭᠤᠷᠢᠨ ᠢ ᠠᠩᠬᠠ ᠪᠠᠶᠢᠭᠤᠯᠤᠭᠰᠠᠨ᠂ | ᠪᠠᠳᠤ ᠴᠠᠭᠠᠨ ᠥᠷᠬᠦᠭᠡ ᠶᠢ ᠮᠠᠬᠳᠠᠨ ᠰᠠᠶᠢᠰᠢᠶᠠᠵᠤ ᠢᠷᠤᠬᠡᠮᠦ᠃ | ᠢᠯᠡᠷᠬᠡᠶᠡ ᠳᠡᠥᠭᠡ ᠶᠢᠨ ᠰᠤᠷᠪᠤᠯᠵᠢᠳᠤ ᠤᠤᠷ ᠮᠤᠩᠭᠤᠯᠴᠤᠳ ᠤᠨ ᠡᠬᠦᠳᠦᠭᠰᠡᠨ᠂ | ᠢᠰᠡᠭᠡᠢ ᠴᠠᠭᠠᠨ ᠥᠷᠬᠦᠭᠡ ᠶᠢ ᠥᠨᠡᠯᠡᠨ ᠪᠢᠰᠢᠷᠡᠵᠦ ᠢᠷᠦᠭᠡᠮᠦ᠃ | ᠭᠠᠩ ᠳᠡᠮᠤᠷ ᠳᠤᠯᠭᠠ ᠶᠢ ᠪᠠᠳᠤ ᠰᠠᠭᠤᠷᠢᠨ ᠳᠤ ᠳᠠᠯᠪᠢᠵᠤ᠂ | ᠭᠠᠯ ᠭᠤᠯᠤᠮᠳᠠ ᠶᠢ ᠤᠯᠠᠮᠵᠢᠯᠠᠨ ᠮᠢᠩᠭᠠᠨ ᠤᠨ ᠢ ᠦᠩᠭᠡᠷᠡᠭᠰᠡᠨ ᠴᠦ᠂ | ᠡᠷᠳᠡᠨ ᠠᠴᠠ ᠲᠥᠷᠦᠵᠦ ᠮᠠᠨᠳᠤᠯᠡᠭᠰᠡᠨ | ᠡᠬᠦᠯᠢᠲᠦ ᠡᠨᠡ ᠥᠷᠬᠦᠭᠡ ᠪᠠᠨ | ᠡᠳᠦᠭᠡ ᠪᠤᠯᠳᠠᠯᠠ ᠮᠤᠩᠭᠤᠯᠴᠤᠳ ᠡᠷᠬᠢᠮ ᠳᠡᠭᠡᠲᠦ ᠪᠠᠷ ᠦᠨᠡᠯᠡᠳᠡᠭ ᠪᠢᠯᠡ᠃ | ᠳᠡᠷᠡ ᠵᠢᠷᠤᠮ ᠢ ᠮᠥᠷᠳᠡᠵᠦ ᠲᠡᠭᠷᠢ ᠶᠢᠨ ᠳᠠᠭᠠᠯᠠᠯ ᠢ ᠳᠠᠭᠠᠪᠠᠰᠤ᠂ | ᠪᠥᠷᠳᠡ ᠴᠢᠨ᠋ᠸᠠ ᠠᠴᠠ ᠡᠬᠦᠰᠦᠯᠳᠦ ᠪᠦᠬᠦ᠋ᠢᠯᠡ ᠮᠤᠩᠭᠤᠯ ᠤᠨ ᠵᠠᠩᠰᠢᠯ ᠳᠤ᠂ | ᠮᠤᠩᠭᠤᠯ ᠭᠡᠷ ᠢ ᠪᠥᠬᠦᠯᠢ ᠪᠠᠷ ᠮᠤᠳᠤ ᠪᠥᠷᠢᠶᠡᠰᠦ ᠶᠢ ᠬᠦᠷᠳᠡᠯᠡ᠂ | ᠠᠶᠢᠷᠠᠭ ᠰᠥᠨ ᠢᠶᠠᠷ ᠮᠢᠯᠢᠶᠡᠵᠤ ᠠᠶᠠᠯᠠᠭᠤᠯᠠᠨ ᠢᠷᠦᠭᠡᠨᠡᠮ ᠪᠥᠯᠦᠭᠡ᠃ | ᠥᠷᠬᠦᠭᠡ ᠪᠠᠷᠢᠬᠰᠠᠨ ᠭᠠᠵᠠᠷ ᠨᠢ ᠦᠨᠳᠦᠷ ᠳᠡᠨᠵᠢ ᠶᠢᠨ ᠳᠡᠭᠡᠷᠡ᠂ | ᠥᠪᠡᠳᠡᠰᠢ ᠪᠠᠶᠢᠳᠠᠯ ᠢ ᠠᠵᠢᠪᠠᠰᠤ ᠦᠯᠵᠡᠢ ᠭᠡᠰᠢᠭ ᠨᠢ ᠬᠤᠷᠠᠨᠠᠮ᠃ | ᠪᠠᠷᠢᠬᠰᠠᠨ ᠭᠠᠵᠠᠷ ᠤᠨ ᠪᠠᠶᠢᠴᠠ ᠶᠢ ᠪᠠᠷᠠᠭᠤᠨ ᠵᠥᠭ ᠠᠴᠠ ᠠᠵᠢᠪᠠᠰᠤ᠂ | ᠪᠠᠶᠠᠨ ᠥᠨᠢᠷ ᠳᠤᠬᠳᠠᠨᠢᠵᠤ ᠪᠠᠳᠤᠵᠢᠬᠤ ᠶᠢᠨ ᠰᠢᠨᠵᠢ ᠳᠤᠳᠤᠷᠠᠨᠠᠮ᠃ | ᠨᠠᠷᠢᠨ ᠯᠠᠪᠯᠠᠵᠤ ᠰᠢᠨᠵᠢᠬᠦᠯᠡ ᠨᠻᠢᠮᠡᠨ ᠳᠠᠯᠠ ᠳᠤ ᠤᠶᠠᠬᠰᠠᠨ᠂ | ᠨᠠᠶᠠᠨ ᠬᠤᠶᠠᠷ ᠤᠭᠤᠰᠤᠷᠳᠠᠢ ᠨᠠᠨᠳᠢᠨ ᠴᠠᠭᠠᠨ ᠥᠷᠬᠦᠭᠡ ᠪᠠᠶᠢᠨᠠᠮ᠃ | ᠳᠠᠰᠢᠶᠠ ᠵᠥᠷᠢᠬᠦᠯᠭᠡ ᠪᠥᠬᠦᠨ ᠢ ᠳᠠᠷᠤᠵᠤ ᠪᠠᠬᠢᠯᠡᠨ ᠤᠶᠠᠬᠰᠠᠨ᠂ | ᠳᠠᠯᠠᠨ ᠬᠤᠶᠠᠷ ᠤᠭᠤᠰᠤᠷᠳᠠᠢ ᠳᠠᠯᠠᠢ ᠴᠠᠭᠠᠨ ᠥᠷᠬᠦᠭᠡ ᠪᠠᠶᠢᠨᠠᠮ᠃ | ᠥᠷᠬᠦᠭᠡ ᠶᠢᠨ ᠪᠥᠬᠦ ᠵᠦᠢᠯ ᠠᠴᠠ ᠥᠨᠥᠳᠦᠷ ᠵᠡᠷᠢᠮ ᠢ ᠢᠷᠦᠭᠡᠪᠡᠰᠦ᠂ | ᠬᠠᠩᠭᠠᠢ ᠬᠠᠨ ᠤ ᠮᠤᠳᠤ ᠪᠠᠷ ᠬᠠᠵᠢᠭᠤ ᠶᠠᠭᠤ ᠶᠢ ᠨᠢ ᠬᠢᠭᠰᠡᠨ᠂ | ᠬᠠᠨᠳᠠᠭᠠᠢ ᠪᠤᠭᠤ ᠶᠢᠨ ᠰᠢᠷᠢ ᠪᠠᠷ ᠬᠠᠮᠳᠤᠷᠠᠭᠤᠯᠵᠤ ᠪᠠᠬᠢᠯᠡᠨ ᠦᠳᠡᠭᠰᠡᠨ᠂ | ᠥᠯᠵᠡᠢ ᠵᠠᠩᠬᠢᠶᠠ ᠰᠢᠨᠵᠢᠳᠤ ᠬᠠᠨᠠ ᠳᠡᠬᠦᠨ ᠢ ᠮᠢᠯᠢᠶᠠᠮᠤ᠃ | ᠤᠷᠳᠤ ᠬᠠᠩᠭᠠᠢ ᠶᠢᠨ ᠮᠤᠳᠤ ᠪᠠᠷ ᠬᠠᠷᠤᠭᠤᠯᠳᠤᠵᠤ ᠶᠠᠭᠤ ᠶᠢ ᠨᠢ ᠬᠢᠭᠰᠡᠨ᠂ | ᠤᠨᠠᠭᠠ ᠳᠠᠭᠠ ᠶᠢᠨ ᠬᠢᠯᠭᠠᠰᠤ ᠪᠠᠷ ᠰᠡᠬᠡᠯᠳᠦᠷᠭᠡ ᠶᠠᠭᠤ ᠶᠢ ᠨᠢ ᠭᠢᠭᠰᠡᠨ᠂ | ᠠᠯᠳᠠᠨ ᠰᠢᠬᠦᠷ ᠰᠢᠨᠵᠢᠳᠦ ᠤᠨᠢ ᠳᠡᠬᠦᠨ ᠢ ᠮᠢᠯᠢᠶᠠᠮᠤ᠃ | ᠠᠷᠤ ᠬᠠᠩᠭᠠᠢ ᠶᠢᠨ ᠮᠤᠳᠤ ᠪᠠᠷ ᠭᠤᠤᠯ ᠶᠠᠭᠤ ᠶᠢ ᠨᠢ ᠭᠢᠭᠰᠡᠨ᠂ | ᠠᠷᠢᠶᠠᠳᠠᠨ ᠪᠠᠷᠰ ᠤᠨ ᠰᠢᠷᠢ ᠪᠠᠷ ᠬᠤᠷᠤᠭᠤ ᠶᠠᠭᠤ ᠶᠢ ᠨᠢ ᠦᠳᠡᠭᠰᠡᠨ᠂ | ᠨᠠᠷᠠᠨ ᠤ ᠳᠤᠩᠭᠠᠯᠠᠬ ᠬᠡᠷᠡᠯ ᠢ ᠨᠠᠰᠢ ᠪᠠᠨ ᠭᠡᠶᠢᠭᠦᠯᠵᠦ ᠤᠷᠤᠭᠤᠯᠳᠠᠬ᠂ | ᠭᠠᠯ ᠤᠨ ᠪᠥᠷᠬᠦᠭᠡ ᠤᠳᠤᠭᠠ ᠶᠢ ᠭᠠᠳᠠᠬᠰᠢ ᠪᠠᠨ ᠭᠠᠷᠭᠠᠵᠤ ᠶᠠᠪᠤᠭᠤᠯᠳᠠᠬ᠂ | ᠳᠤᠮᠤ ᠬᠥᠷᠳᠦᠨ ᠤ ᠰᠢᠨᠵᠢᠳᠤ ᠳᠤᠭᠤᠨᠤ ᠳᠡᠬᠦᠨ ᠢ ᠮᠢᠯᠢᠶᠠᠮᠤ᠃ | ᠬᠡᠨᠳᠠᠢ ᠬᠠᠨ ᠤ ᠮᠤᠳᠤ ᠪᠠᠷ ᠬᠢᠷᠦᠭᠡᠳᠦᠵᠦ ᠶᠠᠭᠤ ᠶᠢ ᠨᠢ ᠬᠢᠭᠰᠡᠨ᠂ | ᠬᠡᠯᠪᠡᠷᠢ ᠳᠥᠷᠪᠡᠯᠵᠢᠨ ᠬᠥᠷᠢᠶᠡ ᠶᠢ ᠬᠡᠮᠵᠢᠵᠦ ᠬᠠᠷᠤᠭᠤᠯᠳᠤᠵᠤ ᠬᠢᠭᠰᠡᠨ᠂ | ᠬᠠᠭᠠᠨ ᠬᠠᠷᠠᠴᠤ ᠠᠳᠠᠯᠢᠬᠠᠨ ᠬᠠᠮᠤᠬ ᠪᠥᠬᠦᠳᠡᠭᠡᠷ ᠰᠢᠷᠭᠤᠳᠠᠬ᠂ | ᠬᠠᠶᠢᠷᠰᠤᠳᠤ ᠵᠢᠭᠠᠰᠤ ᠶᠢᠨ ᠰᠢᠨᠵᠢᠳᠤ ᠬᠠᠭᠠᠯᠭᠠ ᠳᠡᠬᠦᠨ ᠢ ᠮᠢᠯᠢᠶᠠᠮᠤ᠃ | ᠳᠠᠪᠬᠤᠷ ᠴᠠᠭᠠᠨ ᠳᠡᠭᠡᠪᠥᠷᠳᠦ ᠳᠠᠷᠭᠠᠷ ᠢᠰᠡᠬᠡᠢ ᠳᠤᠭᠤᠷᠭᠠᠳᠤ᠂ | ᠬᠤᠶᠠᠷ ᠵᠡᠷᠭᠡᠴᠡᠭᠰᠡᠨ ᠵᠡᠬᠡᠭᠲᠦ ᠬᠤᠰᠢᠯᠠᠨ ᠬᠢᠯᠭᠠᠰᠤᠨ ᠪᠥᠰᠡᠯᠡᠬᠦᠷᠲᠦ᠂ | ᠠᠷᠤ ᠬᠤᠶᠢᠰᠢ ᠪᠠᠨ ᠰᠡᠬᠦᠭᠡᠰᠲᠦ ᠠᠮᠠ ᠳᠥᠷᠪᠡᠯᠵᠢᠨ ᠡᠷᠦᠭᠡᠲᠦ᠂ | ᠳᠠᠩᠭᠤᠳ ᠴᠡᠭᠭᠮᠠ ᠡᠮᠵᠢᠶᠡᠷᠳᠦ ᠳᠠᠩᠨᠢ ᠰᠡᠷᠢᠮᠡᠯ ᠡᠬᠦᠳᠡᠳᠦ᠂ | ᠤᠷᠤᠭᠠ ᠮᠤᠷᠢᠨ ᠤ ᠳᠡᠯ ᠢᠶᠠᠷ ᠤᠷᠢᠶᠠᠵᠤ ᠳᠡᠮᠤᠵᠤ ᠬᠢᠭᠰᠡᠨ᠂ | ᠤᠷᠤᠬᠰᠠᠨ ᠪᠤᠤᠷᠠ ᠶᠢᠨ ᠵᠤᠬᠳᠤᠷ ᠢᠶᠠᠷ ᠤᠶᠠᠵᠤ ᠰᠡᠷᠢᠵᠦ ᠬᠢᠭᠰᠡᠨ᠂ | ᠤᠭᠤᠰᠤᠷ ᠪᠥᠴᠢ ᠳᠡᠷᠢᠬᠦᠳᠡᠨ ᠤᠯᠠᠨ ᠵᠦᠢᠯ ᠢ ᠬᠠᠮᠳᠤᠳᠬᠠᠵᠤ᠂ | ᠳᠤᠷᠠᠳᠬᠠᠨ ᠢᠷᠦᠭᠡᠵᠦ ᠮᠢᠯᠢᠶᠠᠭᠠᠳ ᠳᠤᠬᠠᠢ ᠶᠤᠰᠤᠨ ᠢ ᠬᠦᠢᠴᠡᠳᠭᠡᠶᠡ᠃ | ᠲᠥᠷᠦ ᠤᠯᠤᠰ ᠴᠢᠨᠢ ᠡᠩᠬᠡᠵᠢᠵᠦ ᠲᠡᠮᠦᠷ ᠮᠠᠳᠤ ᠪᠠᠬᠢᠵᠢᠭᠡᠳ᠂ | ᠳᠥᠷᠦᠭᠰᠡᠨ ᠨᠤᠲᠤᠬ ᠴᠢᠨᠢ ᠮᠠᠨᠳᠤᠵᠤ ᠲᠥᠮᠡᠨ ᠢᠷᠭᠡᠨ ᠠᠮᠤᠷᠵᠢᠭᠠᠳ᠂ | ᠥᠪᠴᠢ ᠪᠥᠬᠦᠨ ᠢᠶᠠᠷ ᠵᠢᠷᠭᠠᠬᠤᠢ ᠶᠢᠨ ᠦᠯᠵᠡᠶᠢᠳᠦ ᠢᠷᠦᠭᠡᠯ ᠢ ᠳᠡᠪᠰᠢᠬᠦᠯᠦᠶᠡ︕ |